KE TSOA KAE?

 Haeso bare ke re ke tsoa Ha Mantilatilane, 

Nna ke Mofokeng oa mantoan'a finyela, 

Ha re thelle hoba Manti a ka re tsatsetsa le ba lireng 

Bona bo Mosia Motobatsi, batho bo Ts'ele ho phelela ho nts'a batho mejo hanong.

Ha e re re Ma-ja-Pere 'moho, bo Sebata meno ke lisakha lekeme-keme nameng.

Ha Mantilatilane ho jeoa batho.

Rona bo litsebe, meriana ea mahlanya. 

Motho ke menthele hlooho ea koakoariri.

Mohlakoana o tla ithuta joang ka mp'a lephako?

Sengoathoana sa maoba ke lijo, ts'ela metsi ho ngongobele.

Rona Phokeng re kena hohle ke matjato maphelisa.

Bo Rabuka tse melomo e tlere, ba mpuela 

Ka re ke tla thella, ba re na joang ke pholositsoe 

Haeso ke Khatala, ke phatsuoe ka Mali a konyana 

Ha le 'mone Rameutloa ka lenaka le khabitsoeng likhauta 

Ha a tsebe hore nna ke Mojalefa, lefaats'eng lena ke mofeta-ka-tsela.

Ke Mofokeng, ke Mosotho oa Moshoeshoe

Ke tsoa Ha-'Mantilatilane, boreneng ba 'Ma-ea-Lepoqo.

Sefika sa Moshoeshoe I